أبوذيّات تخص فقد الأب

أبوذيّات تخص فقد الأب

أرحلت و العين تدمع من يسرها

إبمحبتك عطف سرها من يسرها

إبغيابك روحي حزنت من يسرها

الوحيد أنت إلتشافي إجروحي اليّه

***

يبويه الهجر شچني إبرمح وسفه

إبحق گبرك إزينه إبذهب وسفه

أرحلت و النّاس صاحوا حيل وسفه

عزيز و فرگتك تصعب عليّه

***

إبفگد الإبو بدري إندمس منهل

و دمعي إعلى الخدود إنهمل منهل

تأثّر گلبي وكت اللحد منهل

إترابه إعلى الجسد شچ رمحه بيّه

***

إنتهه محصول شوگي إوياك والهم

و صفالي بس عذاب الگلب والهم

گمت أطحن جواني صبر ولهم

إبغيابك گربت إبحالي المنيّه

***

إشب إبنار يوم السرت و أطفا

و أحن و أنظر إصور بإلبيت وأطفا

أنا الچنت أخمد التهب وأطفا

إبغيابك صرت جدحة الكل أذيّه

***

أرحلت يا ريت تسأل ما جرالي

إبغيابك من رأاني ما جرالي

الحض طافاني بعدك ما جرالي

إبنهر سعدي و حصادي بس أذيّه

***

إبحضورك ما خنت غافل وناميت

إبغيابك روحي ما هادت وناميت

بعد لا تنشد إبحالي وناميت

إبثياب السود جلدي إنصبغ زيّه

***

إبوي الچان للديوان شجرة

إبفيايه إيقنّع التعبان شجرة

شفت لمّة إحذه بابه النّاس شجره

حلم صارالي موته إبلا وصيّة

***

جاسم محمد الحسّاني 18/04/1403

ستاره درخشان شعر فارسی و عربی...